البواسير عبارة عن تمدد أو اتساع في الاوردة الشرجية باستعداد وراثي وبتكون عباره عن ضعف في جدران الاوعية ودي بنسميها بواسير أولية أو بادئة وبتزيد مع الحزق والإمساك وبعض الأعمال البدنية العنيفة وأحيانا بتكون البواسير ثانوية ناتجة عن حالات ثانيه موجودة أو أمراض مزمنة زي أمراض الكبد أو أورام المستقيم أو القولون , والبواسير بتكون درجات حسب الشدة فمثلا الدرجة الأولى ودي البواسير بتكون فيها من داخل قناة الشرج وبنسميها بواسير داخلية وفيه بواسير الدرجة الثانية ودي بتنزل يعني بتخرج خارج الشرح اثناء التبرز وبعد الانتهاء من ذلك والراحة بتبتدي تدخل تاني لوحدها أو المريض بيدخلها , وفيه الدرجة الثالثه ودي بتكون نازلة طول الوقت سواء في الحمام أو غيره , وبيكون معاها ألم وحرقان وساعات بتنزف دم , وفيه أكثر من كده اللي هي بواسير درجة رابعة ودي بتكون نازلة طول الوقت وأحيانا متقرحة أو ملتهبة أو بتنزف أو فيها اختناق أو تجلط أو بيكون معاها سقوط في الشرج يعني تحس إن الشرج مقلوب لبره زي الشراب ودي طبعا بتكون تعبها أكثر ويوجد علاجات أو وسائل
مختلفة أو عمليات جراحية لكل الأمور دي على حسب كل حالة بس ما ينفعش المريض يختار الوسيلة كده من نفسه ولكن يجب ان نشخص الحالة بدقة وبالكشف وماينفعش بالتليفون أو الصور أو الوصف لوحده عشان نقدر نحدد إيه إللي ينفع ويناسب السن والحالة الصحية ولو فيه أمراض مصاحبة أو أدوية بتتاخد عشان يتعمل حسابها
